當前的位置 : 首頁
財技佬眼中 50 年後的香港
作者 : 隨風 | (人氣:488) | 2014-08-25 14:34

事前聲明 : 如只是想要股票號碼的話及抱有政治立場的話 請把此網頁瀏覽器關閉

前幾天跟一班老前輩去北上Gathering , 美其名曰要教筆者玩草地滾球 , 但當然學周生分主菜同配菜 , 草地滾球只係配菜 , 吹水先係主菜 , 所以成個過程都不外乎係吹水吹水加吹水 , 以下係筆者的校對並精華後的對話 :
(以下是筆者一班老前輩的對話 , 他們跟筆者一樣並沒有政治立場)

A : 依輪香港真係亂 , 有一班人帶頭搞「民運」、佔中、要求普選、反赤化、反國民教育、反蝗、反自由行 , 總之同中國有關的一切事都反 , 並且要求還政於民、特首下台 , 立法會開開下會有人可以掟野 , 咁同我地當年笑台灣藍綠陣營對抗搞到立立亂有咩分別呀 ?

B : 其實咁先係正常 ,自從中國開始搞改革打貪後 , 對香港干預從暗走上明 ,
原本都好多發展計劃同政策係溫水煮蛙 , 現在只係等唔切要加快進度而已 , 而且啲計根本係殺死左都唔知咩事 , 我從最根本講吧

自從回歸至今17年 , 新移民大大話話黎左80萬人 , 姐係平均每年有 5萬個 , 香港大約有700萬人頭 , 姐係比中國佔領左12%人頭 , 如果按照依個速度50年後香港會有35 %人口係依班新移民 , 假設依班人男女比例對半的話 , 咁都會結婚 , 結婚對象咪係香港人, 所以計70%人會變中港Mix , 毛主席依招簡直絕 , 明抄古代皇帝會用女兒做工具配婚比當權大臣 , 等他們下一代都有皇室血緣 , 三代通婚之後 , 就8成係皇室血緣 , 最後變相比皇室食左成個家族 , 真係殺人不見血呀

C : 而且依啲新移民好多都申請綜援、優先輪公屋、學費津貼 , 基本上政府全包 , 用香港人份糧黎養大陸人並且改善他們下一代教育 , 首先香港會變左一個屬於內地的人民改進基地 , 而且仲可以拖死政府令到政府破產 , 到時再借機科水比香港咪可以係經濟上攻占香港 , 前幾日匯豐調低左香港股市評級 , 想當年97、沙士、海嘯都無事 , 估唔到死係「佔中」手上 , 而家仲話搞縮減自由行 , 啲金鋪全線空鋪 , 零售業簡直係死無全屍 , 都唔知政府點諗

D : 其實減自由行先係高招 , 好似我地那一代細細個就挨餓打工 , 仲邊有時間去搞咁多同諗咁多 , 依家就係因為啲人飽暖就思淫慾先搞到咁 , 我敢講香港有7成以上的經濟係因為內地帶起 , 啲人不停係度叫通漲高、物價高、樓比大陸人炒起晒 , 但他們有無諗過自己人工都升左好多 , 想當年請個人 5千幾做10個鐘 , 而家1萬2都要驚無人黎做 , 按一般速度上車買樓如果用心打十年工一定可以買得起 , 但他們就用啲時間去抱怨政府不給予援助、抱怨地產商托市、抱怨大陸人買高啲樓價 , 咁同叫百佳成本價無利潤咁賣貨有咩分別 , 商人做生意唔洗搵錢咩 , 而且佢地成日話比大陸人勁 , 醒過人地 , 講到人地生番咁 , 但點解班生番比得起錢買香港樓而文明人反而比唔起 ?
計我話一句講到尾 , 係香港人仲未肯接受已經比人超前的現實 , 依家內地班商家同炒家有好多都高班馬黎 , 港股至少有一半比內地資產注入 , 依個就係現實

C : 係我地果代講出黎都比人笑死啦 , 那時買唔到樓只會更努力去搵錢 , 就算英國佬果時都無出過任何一分力去搞民生 , 有邊一個國家啲人會咁好笑買不到樓去埋怨政府 , 而政府倒真是肯去接依個責任 , 香港人在叫樓價高時 , 沒考慮過內地仲慘過你 , 係香港係劏房時 , 北京係住地下室、深圳係十個人分租住一個25平方米單位 , 君不見北京、上海樓賣梗7萬元1平方 , 而平均工資只係5千大元 , 按樓價跟平均工資黎計 , 人地好似辛苦過我地幾皮 , 他們最後都買到樓 , 只係要挨、要辛苦 , 對比之下香港人承受的所謂高樓價算得啲咩呀 , 明明係因為自己唔肯挨苦先搞到買不到樓 , 如果把拎去玩樂的錢存起 , 至少30歲前一定夠Pay首期 , 所以我就話依一代太溫飽怕受苦 , 話樓價高上唔到會 , 03至08年時任買 , 結果?

咁姐係好似玩股票咁大插時就怕輸唔肯玩 , 結果升左啦就係度埋怨唔敢高追 , 世上邊有免費午餐?

B: 講到尾都只能講現在生活環境太好了 , 新一代都未試過食樹根 , 所以中國黎個置之死地而後生 , 先減自由行再借香港政府把話出招禁止大陸人黎買樓 , 明係幫香港人 , 暗手係搞死香港經濟 , 記得梁振英係紅底 , 永遠都係紅底 , 等香港經濟衰退進入通縮期 , 黎個大通縮 ,
到時未經歷過無工開無飯食的人經歷一下慘痛 , 通縮物價的確會下趺 , 但你係咪人工唔使縮? 通常連鎖效應就係一大班人失業、燒炭 , 啲樓無左班大陸人買 , 建築商先炒一班人 , 再黎物管、零售、飲食 , 根本就係全線崩潰 , 依招叫做同歸於盡 , 好似A君你溝啲明星仔咁 , 人地紅梗時太串所以溝唔到 , 咁咪使暗手搞到她走下坡、雪埋 , 最後一定得手 , 仲平價好多!!

唔理最後幾殘 , 因為殘左都好 , 至少溝到 , 所以計我話依家就係行梗依招 , 到最後中國一定會收得翻香港 , 分別只係收翻一個當紅炸子雞咁的香港定係殘左的香港而已
加上河套計劃、高鐵、港珠澳橋 , 不停係度開新關 , 退後條邊境線 , 加速香港翻大陸的速度 , 高鐵第日係佐敦到福田只係11分鐵 , 上廣洲就半粒鐘 , 問你死未 ?

C : 計我話如果想政府有所改變 , 上街遊行同高登仔係電腦前做鍵盤戰士無分別 , 都只不過係一班人係度自我滿足 , 話自己企左出黎出一分力而已 , 到最後根本就零改變 , 實實在在如果真的要改變不如讀好D書向上流 , 自己去當官做特首 , 到時全部官都係自己人 , 咁人地想點黑你都做唔到啦 , 我相信咁會比等政府聆聽民意還來得要快

而且現在的佔中目的反而更鬼鼠 , 明明一定搞唔起 , 但就有一班知名人仕去搞 , 其中幾個仲好像暗手係紅衣披身 , 話唔定係中央玩的無間道 , 當民怨最高點時 , 搵一班人去策動一場大事 , 然後就一隻一隻領頭羊放棄 , 等大家覺得儘晒力後就認命 , 真高招!!

(PS. 筆者最後都係搵不到滾球之樂趣 , 但好像仲要為打球特登去澳門…….)

事後聲明 : 此故事純粹吹水 / 虛構 , 不包含任何政治立場及意見

筆者只係一個聆聽者 , 但從往往可以從他們對話中得到左很多 , 而以上故事如唔岩看請一笑致之 , 因為依個只係一班無政治立場的退休旦散閒聊而已 , 不用太認真


-->
免責聲明:以上的推介並不構成任何投資建議,投資涉及風險。