當前的位置 : 首頁 > 所有文章 > 大市分析
大市難睇,但都要睇
作者 : 龍威 | (人氣:530) | 2014-10-12 00:00

早前Phemey 兄話呢到冇人寫大市分析,以及財技股以外啲嘢,為増加網頁瀏覽,所以叫小弟頂番飛,之後請我食飯喎。
簡單自我介紹,玩咗股票十幾年,由大市分析、基礎分析、技術分析、財技分析,乜春都識少少,但冇樣精。由於小弟未發大達,故不能分享賺大錢經驗,只能分享pk經驗,所以非常真貴,介紹完畢。

1.png

執筆之時,正是佔中運動人稱遍地開花,我稱遍地人渣之時。要為此等政治市去作分析,難度極高,出錯機會大,但為厄餐飯食,都要頂更上。

首先一個簡單問題,點解要分析大市?理由好簡單,唔理你玩咩股,大價股,中價股、細價股也好,你係基礎派、技術派,或財技派都好,都會受大市影響。 雖然部份財技股可能影響較細,但市差出手亦減低勝算。簡言之,倾巢之下,豈有完卵? 或大牛市中,放飛標亂買,亦可賺大錢。由於大市對炒股非常重要,就算難睇,我都花近一半時間研究大市,而非個股。今次大市急速轉壞,閣下個倉縮咗幾多,就 知炒股唔可以唔理大市。

早於9月初,小弟已不斷呼籲身邊好友,港股及美股都有危險,要開始撤退,自己亦身體力行,減持了大部份港股(沽了大中價股,部份錢買了防守較強嘅股仔),然後又清了美股倉,如果唔係都好很大穫!朋友問,我成日睇錯巿,點解今次咁精靈?我當然要把握機會認屎認屁,解釋一番⋯

有人會問,我玩港股都玩唔晒,邊得閒理美股? 咁就錯喇,美股始終係大哥大,佢嘅一舉一動,都會直接影響亞洲股市,大部份情況下,美股所發生的事,例如邊啲係強勢股、弱勢股,邊啲係領袖板塊、落後板塊,基本上都會係亞洲重演一次,對炒港股有很大啓示。

分析大市要從圖表及技術分析入手,因為消息及數據很多時係滯後指標。好多財演分析大市,會講下移動平均線、RSI、支持位/阻力位云云….如果分析 大市咁簡單,用一两個指標就攪掂,呢個世界就冇窮人….. 我認為最有效的,不是單一圖表的技術分析,而是金、股、汇、債綜合分析法,即係分析佢地既互動關係,去推搞大市方向,非常長篇,遲啲有機會先分享。
由淺入深,先講番大哥大美市,睇下呢個Dow Jones 3個月圖。

2.png

其實美股升勢已久,小弟一直留意幾時會調整,係19/9终於出現一個明顯訊號。圖中圈住嗰粒陰陽燭,人稱老鼠尾或避雷針(呢度唔詳細講陰陽燭,自己 睇書) 。當時美股升勢巳久,19/9當時出现 ”大成交” 老鼠尾,意義重大。簡單講,老鼠尾嘅出現,是當曰牛軍已經非常努力,想再將指數推高,與熊軍展開異常激烈戰鬥(所以特大成交) ,但最终被熊軍氣勢蓋過,熊軍幾乎完全收覆當曰失地,到下一個交易曰牛軍亦無力反擊,陰陽燭形成升老鼠尾跌組合,是個明顯見顶訊號。所以,每逢見個股、大 市升咗一輪又見到咁嘅情況,大家就要小心喇。
此外,小弟最愛技術指之一MACD(其原理及用法要自己查書),跟 Dow Jones出現顶背馳(見圖),是另一利淡訊號,再加上19/9 是超级巨無霸阿里巴巴上市好日子,市場已興奮咗一段時間,係候sell on fact.
咁係唔係就以上理由,就得出美股短期見頂嘅结論?未住,仲要其他嘢配合。通常睇大市,都要幾個指數互相配合、互相確認。美股有幾十個指數,雖然睇唔晒,但 小弟最低限度會睇Dow Jones, S&P 500及Nasdaq,睇下佢哋一唔一致,有冇互相確認,若冇準成度就唔高。
睇吓以下S&P 500及Nasdaq個圖,其實同Dow Jones嘅情況好相似。

3.png

4.png

睇完呢幾個大指數圖,大家都屬高位大成交後轉弱,係咪就肯定叛斷到美市已短期見顶?
都仲未,最好再得到其他嘢配合,例如美國國債息率走勢。10年期美國國債一般代表性比較大,因為較多人買。美國國債息率,跟美股嘅一般關係是正面關係,即 股市升,債息都升,股市跌,債息都跌。主要理由係大部份錢一般只會去兩個地方,一係股市,一係債市。若股市有隱憂,錢會流入債市避險(到時會債價升而債息 跌) 。
以下呢個10年期美國國債息率走勢圖,由19/9開始,市場對股市有擔憂,將錢由股市轉向债市,所以債息開始下跌,正正就確認咗美股短期見顶嘅訊號。

5.png

當時小弟為確保見頂嘅睇法冇錯,我哋又睇吓個VIX 恐慌指數圖:

6.png

(Volatility Index)又稱波動指數,是由CBOE(芝加哥選擇權交易所)在1993年推出。
指數反映出投資者願付出多少成本去對待自己的投資風險,因此廣泛用於反映投資者對後市的恐慌程度,又稱「恐慌指數」。當指數愈高意味投資人對股市狀況感到不安;當指數愈低,表示場上的股票指數變動將趨緩。
個VIX圖19/9及22/9嘅情況,又互相配合到股市见顶嘅訊號。
正如之前講,既然美股唔掂,港股冇運行嘅機會都好大,當時港股都有好多利淡訊號,由於時間關係,今次先睇下文章受唔受歡迎,下次有機會先同大家分享吓我對港股當時嘅分析,及對後市嘅睇法。

作者 : 龍威

Phemey 學生,掌握大市情況,配合莊家出擊訊號

-->
免責聲明:以上的推介並不構成任何投資建議,投資涉及風險。