當前的位置 : 首頁 > 所有文章 > 其他財技
買一隻可能炒兩日的股份
作者 : 沙嗲牛 | (人氣:965) | 2014-10-01 00:00

呢期細價股日日坐過山車,多多少少同中國天然氣(00931)攪寸晒個Party有關,若不幸3蚊樓上坐上了中國天然氣列車,唉……只可以說一句「慘不忍睹」! 為左避風頭,開始留意應有異動的中價價,今日想講華人置業(00127)。


我知道,若推華人置業,有唔少人心裏暗暗「媽差」,想必與大股東「大劉」劉鑾雄,過去炒股「食人唔吐骨」、有好嘢點會益人有關! 無錯,「股壇狙擊手」大劉絕非浪得虛名,但澳門御海南灣項目牽涉貪官歐文龍,大劉亦因而被澳門判囚5年3個月(雖然佢仲日日去福臨門),情況會否有變呢?


在9月初的一個早上,華置突然宣布,以最多163億元,向大劉出售包括澳門御海南灣,以及尖沙咀新港中心商場及地庫等資產,呢個解釋到,點解華置過去一直無為御海南灣呢個項目做大額撥備,因為原來最壞既情況,就係大劉自己食返晒。


背後動機係乜? 周顯大師一語道破,大劉唔回購的話,分分鐘香港都會惹官非。翻查資料,華置於2005年及2011年分兩次購入御海南灣項目地皮,當時公司指賣家屬獨立第三方,但在澳門行賄案中,法院指大劉原來一直控制有關項目,當中或有虛假陳述之嫌。未知大劉是否心中有鬼,急急將御海南灣連同新港中心打包一齊賣掉,掩人 耳目。


大劉的動機,我唔關心,但就非常關注結果,皆因華置話,會將差不多套現所得,即最多163億元既相若金額,分一次或多次派息俾現有股東作為中期股 息,如果除返目前華置大約19億股已發行股本,最樂觀估計,每股最多可以攞到8.55元。就算打個五折,都應該有近4蚊3,相對目前華置大約21蚊的股 價,可以話好回味吓!


而以大劉唔會死錯人既性格,華置絕對有盡派息誘息。大劉目前持有華置74.99%權益,街貨乾到震,如果華置派一個特別股息,大劉自己亦分到最多,而扣除特別股息後,大劉真正動用收購資產既資金,大約只需41億元左右,一箭雙鵰,大劉絕對玩得起。


要炒交易、炒派特別股息,一定要留意重要日子。而家華置會於10月8日舉行董事會商討派發特別股息事宜,同月10日就會舉行股東特別大會表決交易,可想而知,股價於呢兩個特別日子,或會有特殊反應,風險就在於最終派幾多及如何派發特別股息。


作者 : 沙嗲牛

睇通告,搵真銀,係人生最大樂趣


-->
免責聲明:以上的推介並不構成任何投資建議,投資涉及風險。