當前的位置 : 首頁 > 所有文章 > 大市分析
2015年展望及投資策略(中)
作者 : 龍威 | (人氣:1072) | 2015-01-10 13:08

小弟一個月前推介隻肯秀麗1387,星期初終於開車,最多先近50%至$0.49,心情即刻開心番晒。呢隻嘢小弟除權前買入,之後$0.02沽咗個權(因唔打算供),成單嘢總成本約$0.34,小弟當然冇咁醒係$0.49出貨,大約係$0.42走了80%貨,揸貨唔夠一個月執25%,算對自己有交代。事實上,隻嘢當時預計佢係供錢,應該係付款曰前要炒,最後竟然係付款日後,但供股結果及新股出前大炒(又唔似供乾),小弟真係想唔通。雖然最後都同預期賺約25%,但早前嘅分析有少少唔正確,賺到錢係有啲運氣,情況有如病人個手術唔算太理想,但病人卻康復了。雖然有錢賺,但小弟比較介意嘅,係整個思考及分析過程有不足之處。這正如小明佢溝到條靚女,佢話條女鐘意佢有才華,事實上條女係鐘意佢屋企有錢,條女亦唔覺佢有咩才華,雖然條女最終都係受溝,但分析上犯咗嚴重錯誤,呢個其實好很重要。

blob.png


另外,有基楚分析嘅兄弟問我,點解1387啲咁圾,咁高風險既股票都落唔少注碼。其實我想講,先唔計財技分析,衡量投資風險高低,唔單只係注碼多少,時間長短亦好重要,股票揸兩星期,跟揸一年半載嘅風險完全係兩碼子嘅事。


上次講到,滬港通目前令人失望,南向額度消耗極少。但小弟其實長遠非常睇好滬港通,有幾個理由:

1)有人話啲國內資金若對港股有興趣,晨早就透過其他渠道黎晒香港,駛鬼等滬港通咩!小弟認為,呢種講法某程度是對的,但目前仲有好多資金不願大舉南下,係因為國內仲有好多有錢人,對股票投資未產生足夠興趣。內地股民經歷A股沉寂咁多年,個心早巳灰晒,信心唔可以係一兩個月完全回復。國內投資者基本上係,對股票投資呢樣嘢失去興趣,唔關A股或H股或其他地方股票問題。今次滬港通最重要嘅,係正好幫助激活咗A股市場,慢慢令股票投資氣氛轉好,令更多投資者對股票產生興趣,恢復信心,跟住就應該慢慢擴散,會將目光投放係鄰近嘅港股。


2)目前來說,唔單只部份國內投資者,對股票投資暫未產生濃厚興趣,就算對股票有興趣,始終唔熟悉港股、法則及潛規則等都唔多清楚,需要時間慢慢學習。記得以前,內地推出"自由行"政策刺激本港旅遊及零售業,最初咪又係得小貓三兩隻,要等兩、三年強國旅客先習慣,之後大軍先來吃喝玩樂,宜家黎玩啲強國人多到呢⋯⋯有啲香港人仲想趕佢地走添。總之,北水應遲早會大舉南下,不過準確時間難以掌握。


唔單只滬港通,宜家又話有深港通,咁究竟有咩好買呢?中長期而言,好多股票都會唔差,但小弟就悶啲,鐘意388,早幾日又加咗注,博一年後希望有20-30%回報。而短期內應繼續炒唔同板塊中大價股,細價股要休息。由於今次升浪只集中幾個板塊(金融、保險、基建及航空等),唔太健康,若要大市升勢持續,必須要擴散到其他板塊接力,否則升勢很難持續。目前見到醫藥、地產建築、電訊、科技等好似想接力,要留意呢幾個板塊龍頭,下一次再詳細硏究。


-->
免責聲明:以上的推介並不構成任何投資建議,投資涉及風險。