當前的位置 : 首頁 > 所有文章 > 大市分析
2015年展望及投資策略(上)
作者 : 龍威 | (人氣:1181) | 2015-01-03 13:25


執筆時係2015年第一日開市,結果紅盤收市,升252點,總算有個好開始。過去兩星期多,大市相當靚仔,不斷反覆向上,可惜細價股就唔多生性,皆因啲錢走晒去大中價股。過去小弟玩大中價居多,理應有不俗收穫,可惜小弟過去幾個月,花多咗時間睇細價股,小咗睇大市及中大價股,未能完全把握到今次升浪,認真失威。但總括而言,細價股有少少斬獲,應可彌補到中大價股之失,所以再一次證明,任何時候都不能賺盡所有錢(當然大部分人都想),只能係某些時間,某些地方,賺某些嘅錢,不能太貪心。


踏入2015年,大家最關心嘅細價股/財技股,睇黎暫時冇乜運行,但當然唔代表冇細股升,只是命中率較低而已,細股旺時十隻最少有七八隻中,唔旺時就只得兩三隻。細股幾時可重生,小弟真係唔知,只認為啲錢去唔去炒佢地,主要有兩個情況:1)大市唔上唔落,但死又死唔去,啲資金去炒中大價股唔太搵到食,唯有去細價股到攪攪震,即好似早幾個月前咁。2)牛3出生,大中價股已全部炒貴晒無嘢可炒,唯有炒垃圾股,即市場市雞太皆升,開始陷入瘋狂狀態,宜家又未到。以上兩種狀態應短期內都唔會發生,所以玩細價股嘅兄弟可能要再等下。但錢卻不能等,2015年究竟有咩投資機會?


未來一段時間,應該是中大價股嘅天下,唔同板塊輪住炒,而炒中大價股又要先睇大市。事實上,小弟對2015年整體股票大市相當樂觀,唔單只2015年,2016都應該會好,原因主要係全球資金仍相當充裕,歐洲及日本不斷放水,而大哥大美國經濟又唔錯,咁啱今年又係大選年,一般都要撐住個巿;而祖國方面早前下調咗存款儲備,未來應該會再減息,跟住又有咁多改革動作去刺激經濟,A股市場過去2個月已話比大家聽非常受落。至於早前嘅滬港通,暫時睇好似無料到,資金南向額度消耗極少,但小弟認為長遠一定有所作為,下次再同大家講下。至於近期升市,主要受惠於「一帶一路」,但大市上升只非常集中於幾個版塊,包括金融、保險、基建及航空4個板塊,並唔算非常健康,其餘二十多個板塊冇乜點郁。由於篇幅所限,小弟下次再同大家研究下選股策略,在此預祝大家新年快樂,股票買邊隻升邊隻。

leon.jpg


-->
免責聲明:以上的推介並不構成任何投資建議,投資涉及風險。