當前的位置 : 首頁 > 所有文章 > 大市分析
恆指不能完全反映大市
作者 : 龍威 | (人氣:1120) | 2014-12-27 14:47

近日大市做番好小小,但大部分細價股一樣冇運行,原因係市況轉好佢哋最遲升,市況開始轉差佢哋就最先跌(仲要係跌穫甘),大部分情況都係咁,所以大家得閒要feel下個大市。 一般財演睇大市,好多時只會睇單一圖表(如恆指圖),或睇單一指標,如趨勢線、支持位/阻力位、RSI、或陰陽燭等,如果真係咁簡單,睇一兩個標準就攪掂去炒期指,呢個世界就冇窮人。

小弟早前分享過,睇大巿一般會睇幾個市場作參考,另加金、股、滙走勢互相確認,最好再睇埋資金流向及市場氣氛,所以要睇幾十個圖,是項艱鉅工作,但別無他法。

今日同大家介紹一個重要工具,小弟平日若唔夠時間分析大市,一般都會參考下佢,佢就係Market Breadth,中文叫市寬。究竟市寬係乜東東黎?現在粗略講下。


剛才提過,一般人睇大巿,普遍會用上述技術指標分析恆指圖,本身其實冇乜大問題,不過嫌恆指圖只集中睇幾十隻成分股,唔夠代表性,未能完全地反映大市健康狀況。而市寬嘅概念,就是以不同技術指標,一次過睇晒市場上所有股票,比只睇指數意義大很多。簡單啲講,你見到恆指MACD黃金交叉,但對分析大市而言,其意義遠不及分析市場上千幾隻股票中,有幾多%MACD金叉;又或者市場上有70%股票創52週新高,其意義重要過只見恆指創52週新高。舉一個例子,恆指剛破52週新高,但市場上只有30%股票創新高,咁即代表大市不太健康,恆指破位不全面,只屬虛火、或只是大戶做嘢,有幾會見頂回落。以小弟所知,市寬概念最先由美國引進,近幾年香港先有人講下。

宜家先睇下由移動平均線做指標嘅市寬:

20141227_2.jpg.png
呢個係以250天平均線做指標嘅5年香港股票市寬,佢話比大家聽全港千幾隻股票,有幾多隻高於250天平均線。小弟是Trend Follower,而移動平均線係個不錯嘅趨勢性指標,小弟經常參考。

250天平均線量度長線趨勢,而小弟睇市或股票走勢,一般先睇長期走勢,然後睇中期,最後睇短期走勢。上圖所見,橙色缐係恆指,藍缐代表全港有幾多%股票升穿250天平均線。兩條線走勢過去5年基本一致,但最重要的,係睇兩條線有冇背馳現象,如指數升市寛唔升,好似2011年上半年(白箭咀),指數一頂高於一頂、市寬就一頂低於一頂,最終指數都會被拖番落黎。目前股價高於250天線為44.1%(剛上升了1.2%),未過50%,暫時屬中性,大市未完面轉強。

20141227_3.jpg.png
再睇下中線市寬,以股價高於50天線比率作參考。過去兩年,基本上兩條線一有背馳,恆指最後都要跟番市寛方向及走勢,所以有一定預測作用。藍線目前係支持區,不容有失,讀數為28.8,屬偏弱。

 

20141227_4.jpg



短線市寬方面,設定為3天線高於18天線比率,目前讀數為26.6%,即代表有26.6%股票,3天線高於18天線。宜家條線係支持區,似乎想轉勢反彈,即代表恆指短期內好可能繼續反彈多一小段。

總結係以市寛角度睇,恆指短線有機會再上一段,但中線而然市底一般般,要再觀察。但就算大市真的開始轉強,小弟估暫時都未輪到細價股,要再慢慢等下。

-->
免責聲明:以上的推介並不構成任何投資建議,投資涉及風險。