當前的位置 : 首頁 > 所有文章 > 大市分析
滬港直通車慘變鬼列車
作者 : 龍威 | (人氣:589) | 2013-12-10 18:46

市場期待已久的滬港通已經開始,執筆時已推出第三日,可惜情況強差人意,每日都用剩大量額度,一日不如一日,直情可用"鬼列車"來形容。早在市場正興高彩烈迎接呢架"鬼列車"時,老狐狸兄已私下提醒,叫大家小心反高潮,結果不幸言中,真不愧為老狐狸。呢招sell on fact, 其實都幾有用,小弟偶然都會偷來用下,當然唔係次次中啦。

講番個大市,睇下最新恆指圖。

1111.png

"鬼列車"推出當曰,出現一支大陰燭(白色圈住),而前一天是一支小陽燭,小弟無記錯的話,呢個組合叫"破頭穿腳",是重要利淡訊號,尤其是組合在市況經過一輪上升後出現。
簡單講兩句,"破頭穿腳",是首先出現一枝陽燭(低開高收),而第二天出現陰燭(高開低收),其燭身比前一支陽燭較大,並且完全遮掩或吞沒前陽燭的燭身。簡單講即是陰燭(第二支燭)的開市價必須比陽燭(第一支燭)的收市價為高;而陰燭(第二支燭)的收市價必須比陽燭(第一支燭)的開市價為低。
呢個組合係呢個時候出現意義重大,當時大家興奮迎接"鬼列車",大市已升咗一段時間,再加上傳統智慧sell on fact, 所以非常值得重視。於執筆時大市再連跌兩天,己跌破中期上升軌,RSI又跌穿50,MACD又剛出死亡交叉,究竟要跌到幾時?

個人覺得要再跌幾百,但最多3-5百點,理由是:1)資金暫未有大量流走跡象,而上圖顯示恆指成交重貨區於29000點-23000點,呢個位應有不俗支持。2)環球股市趨勢繼續向好,尤其是影響港股最大既美國、中國及日本,港股理應不會太差。 3)佔中等負面消息已近尾聲,加上近年尾,班有為芬佬都要開飯,點都要托住下的股價交功課掛。 4)今次滬港直通車雖變成"鬼列車",當時由約23000點開始炒起,就算宜家變咗"鬼列車",理論上最多咪返回起點。
但事實上,我認為個市好大機會短期內再跌多二三百點,睇下呢個恆指牛熊證分佈圖:

2222.png

呢個圖顯示牛熊證街貨分佈,見到宜家牛熊證街貨分佈都幾不衡,37%熊證,63%牛證。而牛證重貨區在23000-23300點之間,共涉及逾3000張期指,我睇大戶一定唔會放過呢批牛證。大家有眼睇,大戶炒上跟本冇乜肉食,一定要借滬港通冇料到向下殺先有肉食,仲係啖啖肉果隻,所以短期內很大機會要向下殺多幾百點,咁先稱得上係大戶。

-->
免責聲明:以上的推介並不構成任何投資建議,投資涉及風險。