當前的位置 : 首頁 > 所有文章 > 賣殻股票
何鴻燊頭馬「激戰」中共元老之子
作者 : 李洛克 | (人氣:649) | 2014-05-15 17:10

近日某週刊報導,賭王何鴻燊頭馬,綽號「飛仔強」的李志強與中共元老萬里之子萬伯翱爭殼。中國國家文化產業 (00745) [前稱中鐵聯] 獲得垂青,是因為有進軍電影業的概念。 4月頭正式宣佈以$20億可換股優先全購i-Marker Culture & Media,引入荷里活電影於內地播放。不過,轉型電影業的消息其實早於去年9月已通晒天,股價亦喺4個月內由三毫幾子炒到上兩蚊。

股價一星期蒸發超過七成

全購通告出街翌日,股價高位曾升37%,收市$0.81,都仲有11%升幅。跟住股價就 $0.68、$0.50、$0.38、$0.28再去到4月15日的$0.186收市才止血。嘩!!!幾日跌左77%!!

1.png

不過…

2.png

「大奇蹟日」呀!! $0.236、$0.390、$0.480再去到4月23日收市的$0.495。

3.png

由4月15日低位既$0.145,反彈到4月23日的高位$0.540,升超過2倍!? 容祖兒的《心淡》可以話完全切合買左呢隻股的朋友,「跌到極麻木 只好相信 又再爬得起 就會有轉機」。呢幾個禮拜的股價,「大概也夠我 送我來回地獄又折返人間」。

中國家居 (00692) 的翻版

今次股價插水,傳出因為莊家的人頭戶口,喺中國國家文化產業 (00745) 宣佈全購 i-Marker Culture & Media後,見到股價有可觀升幅,偷步散貨,引發連鎖反應。呢個故仔同中國家居(00692)可以話一模一樣,不同的地方是後者需要停牌「籌旗」救殼。前者既幕後人士就夠晒叠水,話連隻殼都有能力食埋。事緣是莊家引入李志強為首的澳門幫,諗住聯手炒起中國國家文化產業 (00745)。但籠裡雞作反,有人偷步沽貨,引起澳門幫不滿。

李志強除了是賭王頭馬,亦是澳門黃金廳主席,同時是朗盈證券老細,而且仲係勵駿(01680)的大股東之一。可見他非常猛料,而且真係水頭充足。所以對他買起隻殼的能力毋庸置疑,睇返4月15日到30日期間的成交,已有116億股(已發行股本52.7億股),涉資$42億。

澳門幫 VS 太子黨

中國國家文化產業(00745)的大股東 Huge Leader Holdings Limited,傳聞是代萬里家族持股。萬里是乜水? 咪係曾任中央政治局委員及國務院副總理,已故中共元老囉。萬里之子萬伯翱,就是中國國家文化產業 (00745) 的名譽顧問。

4.png

睇返週刊報道,澳門幫大概用$0.90去接貨,對股價大跌感不悅,於是在市場掃貨,藉此食左隻殼。太子黨方面,亦唔會咁易放手,在市場大手接左被斬倉的貨,形成兩邊一齊爭貨。

故事情節合理嗎?

澳門幫在市場掃貨,跟手食埋隻殼? 一來喺市場掃,只會越買越貴,增加成本。二來人地係大股東,供吓股或者配吓股又可以攤簿返你的股權。所以,真實性成疑。另外,澳門幫在澳門做叠碼仔生意,而賭廳的客路又係大陸官員,所以會唔會咁公開得罪權貴呢? 而且一向低調的李志強都急於出來澄清,就更加證明唔想得罪有勢力人士。至於隻股有無得炒? 始終跌左咁多,反彈吓唔出奇,但如果炒的理由係澳門幫在市場上買貨想食左隻殼,好似個原因就牽強左啲。


-->
免責聲明:以上的推介並不構成任何投資建議,投資涉及風險。