當前的位置 : 首頁 > 所有文章 > 財技心法
基金大戶怎樣買貨
作者 : 李洛克 | (人氣:824) | 2014-06-01 16:37

我們一眾「老散」買賣股票多數都是在銀行或者股票行開個戶口,然後在網上或者透過電話落盤。落盤的類型離不開限價盤、市價盤、競價盤、競價限價盤及止蝕盤,相信大家都應該知道以上類型的特性。但是大家又知不知道基金大戶,又是怎樣落盤呢?

一般來說,每間 Fund House 都會有個 Central Dealer 幫基金經理落盤,Central Dealer 的角色就是把 orders 發到不同的經紀行去執行。Fund Manager 想買某隻股票的時候,Central Dealer 就睇下用咩方法買貨可以做到個好價錢返黎。基金買貨個size都有番咁上下,所以除了用一般散戶用既落盤類型外,還會有其他的交易指示。試諗下,如果某隻基金想買幾球 Volume 貨,而出面沽盤只係排近 10 幾 20 萬股,唔通傻到落個限價盤排幾球貨出去,吹晒雞話俾人聽想買貨咩?所以如果買貨個 Volume 大的時候,通常都會用 OB 或者 CD order去做。

OR BETTER (OB) Order

OB order全名是Or Better order,睇個名其實都估到啲呢個指示的特性。簡單嚟講,就係等如或優於某個價位就幫我執行啦。假設某基金想買工商銀行(01398)十球貨,想喺$4.95或以下先買,呢個情況就可以落OB order。於是同個broker講:「入1398,10球,$4.95 OB over the day。」意思就係喺$4.95或者以下同我入10球貨,over the day即係做全日,由落盤個刻開始計直到收市。之後,個broker就會睇住個價位慢慢做,可能會擺少少貨喺低位排下隊,又可能在市場即掃,只要低過或等如$4.95個broker就可以買。講得over the day,醒目的broker都會將全日個交易時段「斬件」,睇住時間按比例買貨,而唔會一次過把個盤放晒出去市場排隊或者market即掃。

Careful Discretion (CD) Order

同OB order唔同,Careful Discretion (CD) order係唔會有價格的限制,用咩價錢買貨完全取決於個broker。當然,broker能夠做到個價錢愈低愈好啦。通常落CD order係基金大戶想入貨,但對個價錢無咩特別睇法或者要求的時候用。同前者既分別係OB order有機會最後做唔到張單,又或者只是部份成交,因為有價格的限制。但是,CD order理論上是可以把整個交易完成,除非好極端無人放貨出嚟啦。因為這個instruction無price limit,所以就算個broker用好高價錢成交,客人都唔可以指責他有錯,當然實際上出價都唔會太離譜。

舉個例子,五月廿二日有消息中俄達成4千億美元天然氣合作協議,天然氣相關管道的股份急升。開市時,勝利管道(01080)已經裂口高開7.59% (收市升24%),這時候如果某基金想買返啲貨以免表現落後時,用CD order會比用OB order會較合適。因為你不知道隻股票會升幾多,如果Set定個價,最後有機會買唔到貨。而用Market order一開市即掃,又會怕隻股回返,變左摸頂。

落CD order就可以確保買夠貨之餘,又唔洗擔心入左個全日高位,因為over the day去做,個broker只會按時間按返比例去買貨,所以成交返嚟個價錢都會平均啲。而叻既broker會做到一個相對好的價錢返黎,因為CD order俾左自由度佢地入貨,所以佢地其實可以take view去做,即係個broker見到有人開始想搶貨,佢地可以選擇買快啲,即刻掃貨。

總括來說,OB著重價錢,CD著重股數。上述兩種指令都是講緊很傳統的manual 盤,而人手做的盤會有它的限制,例如:太多盤經紀可能會做唔切,又或者牽涉到誠信問題。所以現在都有很多機構投資者或者Broker會選用程式盤去做,即係Algo。Algo會有很多不同的交易類別給Broker選擇,如VWAP, TWAP等等…但是Algo亦會有它的限制,如成交量好少及沒有什麼掛盤的股票,用Algo是很難做的。今次講住咁多先,如果大家有興趣,有機會再講。


-->
免責聲明:以上的推介並不構成任何投資建議,投資涉及風險。