當前的位置 : 首頁 > 所有文章 > 賣殻股票
震fall過後的鎮科
作者 : 華安 | (人氣:940) | 2017-05-06 23:00

震fall過後的鎮科


今次想講啱啱震完fall完嘅鎮科集團(859.hk)。鎮科嘅震fall源於四月十九日與潛在買方終止磋商的公告。鎮科早喺一月時出咗份3.7通告,公佈有潛在買家對佢檔生意有興趣,當時多個媒體都報導過市傳買家為海航集團。老老實實,係邊個放風俾媒體呢?筆者傾向相信係一位著名唔知用無名氏定有心人嘅人做嘅(實不相瞞,細佬估吓㗎喳),畢竟海航個名都值幾億啦。


睇返鎮科份2016年中期業績,集團嘅生意非常簡單,就係做收租佬。鎮科所持嘅物業約值30億,主要係銅鑼灣嘅銀座式大廈(仲有位於半山嘅金堅大廈地舖等物業),集團淨資產約22億,隻殼係非常乾淨。根據《上市規則》13.24:「發行人須有足夠的業務運作(不論由其直接或間接進行),或擁有相當價值的有形資產及╱或無形資產(就無形資產而言,發行人須向本交易所證明其潛在價值),其證券才得以繼續上市。」。由於鎮科嘅主要收入係租金收入,如果無咗啲物業,鎮科就好可能會違反13.24。所以,新主買殼時亦需要買入呢批價值30億元嘅物業。鎮科嘅物業有價有市,應該唔難賣埋出去嘅。以NAV再加埋7億殼價,合理值為$2.81(未有計及CB嘅攤薄效應)。大股東吳毅目前持股達73.2% (手貨主要係實物股票45.9%同埋放喺華富嘉洛證券27.6%),計埋手頭上嘅CB(如悉數兌換的話),最多可以揸到81.6%。


大股東有哂賣盤動機(過去吹足幾年),現價又返返去未炒作賣盤前。再加上吳毅最近(4月20同21日)都有真金白銀以$1.23及$1.25增持(雖然只係區區六十萬貨),所以現價$1.27係安全嘅。單計佢個NAV(未計殼價)都有成$2.13,大股東又揸咁多,根本唔需要用任何財技再搾乾隻股票。而家的鎮科,相當值搏,相信唔會再震fall㗎啦,不過就可能要耐心等待一下。畢竟賣殼之路相當漫長,建議喺$1.1至$1.25區間慢慢收集,相信過一排又會再吹風賣殼㗎啦!


-->
作者 - 細佬讀過兩年書,股壇中一個迷途小書僮。人生格言為:棋盤內,車無輪,馬無韁,叫聲將軍提防提防。
免責聲明:以上的推介並不構成任何投資建議,投資涉及風險。