當前的位置 : 首頁 > 所有文章 > 其他財技
俊?邊度俊呀?睇過!
作者 : 華安 | (人氣:1830) | 2017-04-19 23:33

俊?邊度俊呀?睇過!


筆者第一篇文章想講吓阿俊文寶石(8351.hk) 。講起阿俊,相信有唔少人對佢滿有戒心,睇圖已經覺得佢樣衰啦,不斷尋底。睇返通告,原來尋底係因為2015年公佈十合一及1供9股(@$0.13)同發CB(@$0.15)嚟收購東方紅。供股條件咁苛刻,當然包銷商英皇證券食唔少…貨啦。單刁輾轉喺2016年8月完成,完成後東方紅變相重新借殼上市。話東方紅重新上市原因係佢早喺1988年上市(當年上市編號279.hk),1994年俾新童輝羅兆輝收購30%股權,再喺1997年俾殼王陳國強收購。2007年由陳國強控制嘅祥泰地產出售東方紅俾私人公司Master Journal。Master Journal今次以6億($4.5億現金及$1.5億CB)出售東方紅俾俊文寶石。


東方紅入主俊文寶石後,管理層隨即大變,大股東兼時任主席陸紀仁辭任,換入司徒惠玲為主席。陳永忠及王鉅成獲委任為執行董事,陳王二人同星美系(星美文化2366.hk及星美控股198.hk)極有淵源,分別做過首席財務官及執行董事。星美系+陳國強+英皇證券有咩啟示呢?喺2015年由覃輝、楊受成及陳國強一齊揸過75%的星美控股,曾經一個月內已急升超過三倍。而星美文化亦試過喺2015年發CB加上同百度簽訂合作協議,喺一個月內急升超過三倍。


講咗咁耐,點解要買阿俊先? 大家會見到幾個大名,東方紅、陳國強、星美系、英皇證券,爭咩吖,溝埋一齊做俊文寶石吖笨。單純以上述理由買入就笨啦,因為佢由2016年8月供股後都未大炒過,可能仲有排等。但吸引筆者眼球嘅係因為2017年3月29日出現嘅大手M盤(二千三百萬股@$0.093轉入中策富匯嗰度),如此倉位異動可以視為爆升催化劑。再睇返CCASS同大利市機,頭十大券商加實物股票已經佔85%,平日買賣差價極闊又少買盤,可能話係乾過阿婆。


首站以供股價$0.13為目標,再上以$0.15CB轉換價為指標,當然穿咗$0.093就投降輸一半啦。總括嚟講,阿俊係幾直搏,相信佢會好似暗器霹靂雷珠一樣,你唔好睇小佢呀,佢爆炸起嚟威力無窮㗎!


-->
作者 - 細佬讀過兩年書,股壇中一個迷途小書僮。人生格言為:棋盤內,車無輪,馬無韁,叫聲將軍提防提防。
免責聲明:以上的推介並不構成任何投資建議,投資涉及風險。