當前的位置 : 首頁 > 所有文章 > 新上市股
穩中求勝 - 汛和集團 (1591)
作者 : 小炒黃 | (人氣:2564) | 2017-03-25 23:19

投資股票市場都係想追求回報, 最好買完就日日爆上, 可惜事與願違, 好多時買完就坐艇, 唔係望嬴幾多, 而係望天打掛, 睇下幾時番家鄉。所以買股票就係要買d 風險低回報高既股, 講就易, 要買得中就要勤力做功課同埋要靠點運, 點解要靠運, 因為你買得中都好, 撞正跌市最後都要止蝕完先升。


穩中求勝即是追求高回報既同時又要風險低, 今日我要分析穩中求勝既股票就係重有幾日就上市半年既半新股汛和集團 1591, 呢隻股票有幾個賣點值得留意。


係講賣點前都簡介一下呢隻股票既業務。汛和集團做既業務就係上年最多疑似啤殼既行業:地基工程。集團之主要客戶為四叔恒基地產之附屬及關連公司、俊和地基工程…


廢話少講, 入正題, 賣點如下:


賣點一: 市值細, 現價$0.109, 市值為4億2千萬, 比殼股價6.5億有折讓。


賣點二: 股權集中, 大股東渣75%, 而果75%唔係喺CCASS入面, 亦即話係CCASS入面得25%, 大約一億市值貨係場內trade緊。頭幾間銀行渣左8.69%貨, 都算乾身, 要開車既話, 易過借火。


賣點三: 保薦人為德健融資,佢最近2年保薦既股票有4隻:1633, 832, 2113, 1591, 其中2隻(1633同8321都有幾倍升幅), 而淨番既半新股2113 近排都升番好多, 睇黎1591 亦都可能好快浮面 。同埋你細心留意下 4隻都係建築相關, 有啤殼嫌疑。重有1591既業務同四叔同俊和呢 d 大公司有關, 水份相對較小。


賣點四: 呢隻股屬於毫子股, 細細隻, 易炒上, 郁一格差唔多1%, 爆上2至3成易如反掌, 12月7日果日, 試過一日扯高3成, 所以一旦落鑊, 非同小可。


今日收市價$0.109, 望佢浮面上招股價都有2成升幅, 用52周低位 $0.99 作止蝕, 10% cut loss 換取回報。如果用殼股方程式計, 用上年12月中出既中期業績計算出既NAV 應該大約1.4億 (如有錯請指教), 加埋6.5億殼價, 應值7.9億, 即0.198, 打個9折都0.178, 潛在升幅 6成, 如果咩都唔理睇齋睇殼價6.5億, 都有5成升幅,重等咩?


如果大家覺得好既請給LIKE同SHARE, 以示支持, 始終係處子之作, 如有不足, 請見諒。



利益申報:本人並沒有持有以上股票

以上純屬個人意見, 並不構成投資建議或勸誘。


-->
作者 - 小炒黃, 熱愛股票市場, 期望炒出個未來! 無股不歡, 除左老千股。炒股格言: 炒賣炒賣, 炒高完就要賣, 切勿留戀!
免責聲明:以上的推介並不構成任何投資建議,投資涉及風險。