當前的位置 : 首頁 > 所有文章 > 財技心法
“財技分析” 勝過 “基本分析”?
作者 : 龍威 | (人氣:1891) | 2015-04-08 09:15

眾所週知,投資股票分幾大派,基本分析、技術分析,或宜家流嘅財技分析。事實上,財技分析派唔算咩大派,或唔算係一派,原因係:1)相對基本及技術分析派,財技派好小人用,只有香港咁有趣嘅地方先流行,世界其他地方唔係咁容易用到。2)嚴格來說,小弟認為財技分析,屬基本分析的一種,理應歸屬基本分析派門下,這好比西方醫學中,再細分心臟專科或骨科一樣。但由於一股人認為,財技屬邪門武功,非正宗武學,因此不是高高在上,自認名門正派嘅基本分析追隨者所能接受。

 

至目前為止,係投資界武功最高強嘅人,公認為股神畢非特。佢嘅最強絶學係"價值投資法",屬基本分析派,呢派武功有幾堅,大家有目共睹,所以股神有好多追隨者。於小弟而言,能夠殺敵的,就是好武功,唔理佢咩派,正如投資炒股票是為賺錢,唔係為做世界級投資者及富豪。

 

財技係乜,無須小弟係度多講,但要講下基本分析,因小弟好多兄弟,練呢套武功去投資,攪到遍體磷傷。話晒都係名門正派,正宗武功喎,點解會咁?而事實上,基本分折底子好嘅投資者,學財技分析都吸收得快啲,但點解咁多人用基本分析去投資,都瀨晒嘢呢?

 

好多人想學股神,以基本分析作基礎,用價值投資法去投資,以為只要分析下財務報表,睇下幾個財務指標,咩PE呀、ROE呀,EPS等等,再計下資產淨抵唔抵,或做個financial model咁就攪掂。如果係咁簡單,大部分讀Finance,或考到CFACPA嘅人,都應該係基本分析派高手,但事實並唔係咁。主要原因,係佢地大部分都唔識做生意,唔知做生意要成功需要啲咩。股神唔單只係財務高手,做生意亦好叻,據說仲係一個出色推銷員。除分析財表,佢亦研究行業前景/競爭狀況,公司business model 公司競爭優勢,及詳細了解管公司理層等等。為咗更了解公司,很多時都插一兩友入去公司董事局,去監察公司營運。一般投資者就要等全年業績、或中期業績公佈,先知公司做成點,但股神就可以掌握最新資訊,每月、每星期公司生意點唔點佢都知,你點同佢鬥。我大膽假設,以上所講的,就算閣下全部都做到,都未必掂。第一,股神EQ極高,當全世界權威人士睇唔好某樣嘢,不斷批評佢,佢可以一條友繼續死撑,呢啲壓力唔係一般人可承受到。第二,佢啲耐性亦到神級,買啲股票,短則揸三五年,長則揸幾十年,咁嘅耐性,想學都冇咁易學到。

以上所講,亦係點解大部分自認基本分析派嘅分析員、基金經理,啲推介及投資回報多數唔掂嘅原因,並非基本分析本身唔掂。 總括而言,小弟認為一般老散,較適合用財技分析或技術分析搵食。

 


-->
免責聲明:以上的推介並不構成任何投資建議,投資涉及風險。